Ассалаумағалейкум, барша мұсылман қауым!

Сонымен, көптен бері ойда жүрген шаруа - Ислам.кз сайтынан блог ашу бүгін өз шегіне жетіп, "Бисмилләһ" деп орындалып тынды:)) Бұл, әрине, күні ертең, 18 маусым күні басталатын Рамазанның құрметіне жасалған іс. Енді, күн сайын демейін, аптасына бірді-екілі жазба шығарып тұруға тырысып бағамын. Мақсатым, дінді өзімнің оқырмандарыма жеңіл және ұғынықты тілмен жеткізу.

Ертең - ораза! Ал бүгін - тарауих! Бүгінгі қозғағалы отырған тақырып та осы тарауихқа қатысты. Әдетте, былай уақытта намаз оқымайтын жандар, ораза уақытында ауыз бекітетін болғандықтан, Рамазан айы бойы оқылатын тарауих намаздарына қатысуды құп көреді. Бұл - өте құптарлық іс. Біз ол мұсылмандардың оразадағы амалдары қабыл болып, бес уақыт намаз бастап кетуін Алладан тілейміз. Дейтұрғанмен, кейбір ағайындар намаз үстінде түрлі жағымсыз мінез-құлықтар көрсетіп, айналасындағы жамағатқа әсерін тигізіп жатады. Сондай бір келеңсіздікті болдырмас үшін, шет елдік мұсылман бауырларымыздың дайындаған видеоматериалын аударып беруді жөн деп таптым. Ондағы мақсат - кейбіреулердің жиіркенішті әдеттерін әсірелей көрсету арқылы, қайталаймын, әсірелеп көрсету арқылы сондай әдеттен қайтару, көркемдікке баулу.

Аллаһ Тағала сіз бен біздің ұстаған оразаларымызды қабыл етіп, қасиетті де, шарапатты Рамазан айында тілеген әрбір дұғамызды қабыл еткей! Әмин!